என் சுயம் எங்கே முடங்கிக்கிடக்கிறது ?

என் உயிருக்கு எத்தனை நிறங்கள்

கத்திரிப்பூவாய் வயல்வெளியாய்

ஆகாயமாய் எலுமிச்சையாய்

வாழையாய் கடலாய்

என் உயிருக்கு எத்தனை நிறங்கள்.

(வேறு )

என் சுயம் எங்கே

முடங்கிக்கிடக்கிறது

உன் உயிரின்

நிறங்களுக்குள்ளா.?

மதங்களையும் நம்பிக்கைகளையும்

விடாமல் பற்றிக் கொண்டிருப்பதிலா?

நிலவையும் இரவையும்

கதிரையும் ரயிலையும்

ரசித்துக் கவிதை எழுதுவதிலா ?

இந்துமதியையும் சிவசங்கரியையும்

நுனிவிரலால் நகர்த்திவிட்டுப்

பாலகுமாரனையும் ஜெயகாந்தனையும்

புரட்டிப் பார்ப்பதிலா ?

ப்ராப்ளம்ஸுக்கு சொல்யூஷன்

கொடுக்கப்படும்போது (வகுப்பில்)

தனியாக ஸெல்ஃப் அனலைஸ்

செய்து கொள்வதிலா ?

எதையும் ஆகர்ஷிக்க முடியாதபோது

அலட்சியப் புன்னகை சிந்துவதிலா ?

நாற்காலிக்கும் மேசைக்கும் நடுவில்

காலை நுழைத்துக் கையை முட்டுக்கொடுத்து

சொல்லடி படும்போது எனக்கு வலிக்கவில்லையென

முகம் மலர இருப்பதிலா ?

பாடம் கவனிக்காமல்

நோட்டுப் பின்புறம்

மனக்கிறுக்காய்

உளறலாய் எழுதுவதிலா ?

எதற்கெடுத்தாலும் மனசுள்

துன்பப் பறவையின் விசை

முடுக்கிக்கொண்டிருப்பதிலா ?

என்னுடைய சுயம்

எங்கே முடங்கிக் கிடக்கிறது ?

-- 83 ஆம் வருட டைரி.