செல்லச்சிட்டே சித்திரமே
சிங்கப் பெண்ணே சிரித்திரு.
மனோபலம் தைரியம்
மந்தகாசப் புன்னகையால் ஜெயித்திரு.
எச்செயலைச் செய்தாலும்
அச்செயலில் சிறந்திடு .
எந்நாளும் நன்நாளே
இன்பம் துன்பம் இரண்டும் உண்டு.
நன்மையையே நீ தேர்ந்தெடுத்திடு.
ஓவியமாய்ப் பிறந்தவளே.
தனித்திருக்கிறேன் என்றோ
தனிமையில் இருக்கிறேன் என்றோ
தொலைவில் இருக்கிறேன் என்றோ
எந்நாளும் நினையாதே.
உள்ளங்கவர் காவியமே
என் உயிர் சமைத்த பொற்சிலையே
உன்னோடு நான் இருக்கேன்
உன் உள்ளமெங்கும் தேடிப்பார்.
கட்டழகுப் பெட்டகமே
உயிர் உருவாய் உருவானவளே
உன் கைப்பிடிக்குள் நான் இருக்கேன்
என்றும் என்னை நினைத்திடு.
துணையாக வந்திடுவேன்.
என்னில் பிறந்து
என்னை உயிர்ப்பித்தவளே.
உள்ளம் பொங்கச் சிரித்திடு .
ஊர் உலகம் போற்றவே
உவகையோடு வாழ்ந்திடு.
அன்பு முத்தங்களுடன்
ஆழமான அரவணைப்புக்களுடன்
என்றும் உனக்கு மட்டுமேயான அம்மா
