வீடு சேர்தல்

புத்தக விமர்சனம் வந்திருக்கிறது

ஒரு நாளிதழ் வாங்க வேண்டும் என்றாள்.

இன்றைய நாளிதழா?

இதுதான் பெயரா

என்று கடையிலிருந்து புரட்டியவன்

அப்படி ஏதும் வந்ததாகத் தெரியவில்லையே என்றான்.

ஒன்பது ரூபாய்க்கு ஓராயிரம் கேள்வி.

வீடு வந்து சேர்ந்த நாளிதழைப்

புரட்டிப் பார்த்து இதுதான், இதேதான்

அரைப்பக்கம் வந்திருக்கே என்று

சொல்ல நினைத்தவள் மௌனித்தாள்

மனைவி எழுதிய புத்தகம் பேர் தெரிந்தால்தானே

இது அதன் விமர்சனம் என்று தெரியும்

அவரவர் உலகில் அவரவர்.

வீடு சேர்தல்தான் முக்கியம்

ரயிலோடும் முன்றில்

பயண ஆரம்பத்தில்

வழியனுப்ப வந்தபோது பார்த்தது.

மேகம் மூடியழவும்

திசைமாறியதில்

எங்கோ காணாமல் போனது.

இருள்பூவாய்ப் பூத்த கண்கள்

தேடிச் சோர்ந்து குவிந்தன.

புலரும் வரை

தேடித் தேடி ஓடித்தேய்ந்த அது

ஏதோ ஒரு திசையில் திரும்பி

எட்டிப் பிடித்தே விட்டது

வெள்ளிப் புன்னகை முகத்தோடு