தினம் உருள்தல்

துறப்பதும் இறப்பதும்
வாய்க்கிறது புத்தனுக்கு
ராகுலனும் யசோதராவும்
விட்டுப் போன மிச்சங்களாய்
கௌதமனின் அடையாளம்
சுமந்து கிடக்கிறார்கள்.
சித்திரகுப்தனின் ஏட்டில்
மார்க்கண்டேயர்கள் மரிப்பதில்லை.
அஸ்வத்தாமனாய் அலைகிறார்கள்.
ஆலம் உண்ட பெருமான்
ஆலாலத்தின் கீழ் அமர
நெருப்புத்தவம் இருக்கிறாள் உமை.
இமயம் உருகுகிறது..
கங்கையும் காவிரியும்
சரஸ்வதியாய் பூமிக்குள் சுருள
சுட்டபடி தினம் உருள்கிறான் சூரியன்..