நிற்றல்

கிளையாட்டிக் கொண்டிருக்கின்றன

தோட்டத்து மரங்கள்

தலையாட்டிப் பார்க்கிறான்

குட்டித் தம்பு.

கழுத்து நின்றதும்

மரம் பார்ப்பதில்லை அவன்

ஆனாலும் தம்போக்கில்

கிளை ஆட்டிக் கொண்டிருக்கின்றன மரங்கள்.

  

வெய்யில் வளையங்கள்

வெய்யில் வளையங்கள்

பூமியின் மீது விழுகின்றன.

அவ்வளையத்துள் நழுவி

உருண்டோடும் பந்தாய் பூமி.

  

நிழல் வாழ்வு

நிழல் வார்த்தைகள்

உன் பின்னே 

ஓடி வருகின்றன.

விடியலில் 

உன் மதுக்கோப்பைக்குள்ளும்

இரவில் உன் வாயினுள்ளும் 

குடியிருக்கும் அவை

சாராயம் ஏறுவதுபோல்

சரசரவென ஏறுவதும்

பின் நாற்றத்தோடு வீழ்வதுமாய்

வாழ்கின்றன.

என்னடா இந்த நாறப் பிழைப்பென

அவை நாராசத்திலிருந்து கூவுவதை

ஒருபோதும் சட்டை செய்ததில்லை நீ.

இருந்தும் சொற்கள்

எச்சமாய் விழுந்தும் எழுந்தும்

இருந்தும் இல்லாமலும்

நிழல் வாழ்வில்.

  

இனிக்கும் வேம்பு

கதவைத் திறந்ததும்

குதூகலிக்கின்றன கிளைகள்

வரவேற்கவும் வழியனுப்பவும்

பூச்சொரிகின்றன

வாலாட்டி அமரும் 

குருவிகளுக்குத் தேனும்

சிலவற்றுக்குக் கொட்டையும்

சிலவற்றுக்குப் பழமும். 

வேம்பும் இனிக்கிறது

எல்லாப் பறவைகளுக்கும். 

  

நிரம்புதல்

இரை எடுத்த பெருமகிழ்வில்

தொப்பையை அசைத்து

அமர்கின்றன பறவைகள்

வயிற்றை நிரப்பிய குதூகலத்தில்

வாயாடிக் கொண்டிருக்கின்றன கிளைகள்.