தொடர்பு.

எப்போதும் நீள்கிறது
என் கவிதை..
முடியாத சொற்களோடு
இழுபடும் நம் தொடர்பாய்..

வார்த்தைச் சறுக்கு..

வார்த்தைகளில்
சறுக்கு விளையாட்டு.
அபாயமான பள்ளங்களில் ஆழ்த்தி
ஆள் சோர அடிக்கிறது.

அங்குசம்

யானைக்குக் கவளம்.
கிளிக்கு நெல்மணி.
சங்கிலியும் கூண்டும்.
கட்டுடைத்துப் பாகனைக்
கரியாக்கும் கரி.
நகங்களும் அலகுமிருந்தும்
தத்தி உள்செல்லும் கிளிக்கு
வெட்டுப்பட்ட இறக்கைகள்
முளைப்பதேயில்லை

மனக்கோட்டை.

சூளையிலிருந்து வந்து
எந்தக் கோட்டையும் ஆகாமல்
பாழடைந்து கொண்டிருக்கிறது
செங்கல் அடுக்கு.

காதல் சிம்மம்

நட்புத்தூண் உடைத்து
காதல் சிம்மம் விசுவரூபமெடுக்கிறது
நம்மை வகிர.