புஸ்தகாவில் என் முதல் மின்னூல் . ”பெண்மொழி”

புஸ்தகாவில் என் முதல் மின்னூல் . ”பெண்மொழி”
புஸ்தகாவில் என் முதல் மின்னூல் . ”பெண்மொழி”

திங்கள், 25 ஏப்ரல், 2016

இதயப் பாலங்கள் உடைகின்றன.



இதயப் பாலங்கள் உடைகின்றன.

இதயப் பாலங்கள் உடைகின்றன
எண்ண அலைகள் ஓய்கின்றன.
எத்தனை கற்பனைகள்
அஸ்திவாரம் ஆயின
எத்தனை கனவுகள்
கற்கள் ஆயின.
எத்தனை ஆசைகள்
இணைந்து கொடுத்தன.
காண்பவர் கண்
வியக்கும் வண்ணம்
பாலம்
படிப்படியாக வளர்ந்து
கம்பீரத்தை அளித்தது.
வளர்ச்சிக்கும் ஓர்
வீழ்ச்சி உண்டல்லவா ?
உள்ளத்தில் அமைந்த பாலம்
உதட்டால் உதட்டுச் சொற்களால்
உடைந்து போன அவலம்.
கண்ணாடி சிற்களாய்
உடைந்து போனாலும்
ஒட்டி வைத்து முகம் பார்க்கலாம்.
உள்ளம் உடைந்தால்
எதை வைத்து ஒட்ட முடியும் ?
சந்தேகக் கோடு ! அது
சந்தோஷக் கேடு. !
இந்த உலகத்தில்
எதுவுமே நிலையானதல்ல !
நிரந்தரமானதல்ல !

-- 82 ஆம் வருட டைரி

ஞாயிறு, 24 ஏப்ரல், 2016

நல்லதோர் வீணை செய்தே ..



நல்லதோர் வீணை செய்தே ..

சுதந்திரம் என்னும் சுந்தர வீணையைச்
சுகமாய்ப் பெற்றுள்ள நாம்
சுவைத்து மகிழ்கின்ற நாம் அதனைச்
சுருதி சுத்தமாய் மீட்டத் தெரியாத மடையர்கள்.

வீணையின் அருமையுணர்ந்த அரும்பெரும்
வீரர்கள் தீரம் பல புரிந்து திரட்டி வைத்த பொக்கிஷத்தை
வீணர்கள் கையிலிட்டால் என்னவாகும் ?
வீணாய் அனைத்துமே சிதைந்து போகும்.

அடிமைப்பட்டே பழக்கப்பட்ட நமக்கு
அரசபதவியைத் தூக்கிக் கொடுப்பதுபோல்
சுதந்திர வீணையைப் பெற்றுத் தந்தால்
அது குரங்கு கையில் பூமாலை.

என்று தீருமென் சுதந்திர தாகமென
எண்ணி உளம் மருகி உடலுருகி
எதிர்த்துப் போராடி இன்னல்கள் பல பெற்று
எட்டாக் கிளையிலிருக்கும் தீஞ்சுவை மாங்கனியை
எட்டிப் பறிக்கும் வேளையிலே ஏட்டிலே காவியமாகிவிட்டனர்
எண்ணற்ற துடிப்புமிக்க இளைஞரும் முதியோரும்.

விடுதலை வேள்வியில்
வெந்துபோன இதயங்களை
விடுதலை பெற்றபின்
மறந்திட்டோம் !
மறுத்திட்டோம்.!!

அந்த அன்பு இதயங்கள் இன்று நம்
அருகில் இருந்தால் இந்த விடுதலைக்கா
இப்படிப் பாடுபட்டோமென
இதயம் நொந்துபோய்
இரத்தக்கண்ணீர் வடித்திருக்கும்.

இந்த அன்புத் தெய்வங்கள்
இன்று நம் அருகிலில்லை.

நல்லதோர் வீணை செய்தே
அதை நலங்கெடப் புழுதியில் எறிவதுண்டோ ?
சொல்லடி சிவசக்தி.. !!!
 -- 85 ஆம் வருட டைரி.

தேடல்.



கானல் தடாகத்தில்
அன்புத் தண்ணீரைத்
தேடிப் பயனில்லை.
தேவைகளுக்காகத் தேடல்களா ?
தேடல்களின் அவசியம் தேவைகளா ?
தேவைத் தேடல்களா ?
தேடல்த் தேவைகளா ?
என் உள்ளம் மட்டும்
மாறவில்லை.
எப்போதும் மாறாது.
ஆனால் நான்
நொடிக்கொருதரம்
இந்த இதயமில்லாக் கூட்டத்துள்
காணமற்போய்க்
கண்டுபிடிக்கப்படுகின்றேன்.
சொல் உளியால்
உடைந்து
நொறுங்கிய
உள்ளக் கேவல்கள்.
அழுகை அவலங்கள்.
பெண்ணே !.
மன உறுதி மட்டும்
மன உறுதி மட்டுமே!
நம் உடமையாக
உரிமையாக
ஏன் கடமையாக
இருக்கட்டும். 

--- 80 ஆம் வருட டைரி.

வியாழன், 21 ஏப்ரல், 2016

உடையட்டும் உன் விலங்குகள் :- 2



உடையட்டும் உன் விலங்குகள் :- 2

பெண்ணே !
பேதைப் பெண்ணே !
உடையட்டும் உன் அடிமைத்தளைகள்.
களைந்துவிடு
உன் இதயச் சுமைகளை. !
அந்த இடிகளைத் தாங்க
உன் பெற்றோரால்
இடிதாங்கியாய்
இருக்க முடியுமா ?
இந்த அடிமைத்தனத்திலும்
உனக்கு ஒரு சுகமா கிடைக்கிறது ?
நீ ஆதியில் அன்னியன்
ஆதிக்கத்தில்
கொடுமைப்பட்டு
அடிமைப்பட்டுக் கிடந்தாய்.
இன்று
கொண்டவனின் ஆதிக்கத்தில்
கொடுந்தளையால்
கட்டப்பட்டுள்ளாய். !
பெண்ணே !
என்று தீருமுன் அடிமைத்தனம் ?
கன்னத்தைக் கழுத்துப்புறத்தைப்
பின்முதுகை முன்வயிற்றைப்
புறங்கையை மார்பகத்தைக்
கெண்டைக்காலை
வரிப்பாலங்கள் இணைக்கின்றன
நெஞ்சில் பசுமை மாறாத இரணம்
இரண சிகிச்சை நடைபெறுவது
சூட்டுக் கோலினாலா ?
பணத்திற்கும் பொருளிற்கும்தானா எல்லாம் ?
பணம் என்றால்
பிணமும் வாயைத்
திறக்குமாமே !
சாதாரணம்.
ஒரு மனிதன் தானேயிவன். !
இவனால் என்ன செய்ய முடியும் ?
என்று தீருமுன் கோழைத்தனம்.
உடையட்டும் உன் விலங்குகள்
தடைக்கல்லாய்
இடைச்சொருகலாய் யாரிருந்தாலும்
உடையட்டும் உன் விலங்குகள்.
உடைத்துவிடு உன் தளைகளை

-- 83 ஆம் வருட டைரி. .

புதன், 20 ஏப்ரல், 2016

மன உறுதி மட்டுமே !



மன உறுதி மட்டுமே !

கிளியாய் நான் பிறந்தாலும்
கிள்ளை மொழியில் கொஞ்சியிருப்பேன்.
கட்டெறும்பாய்ப் பிறந்தாலும்
கனிவோடு வாழ்ந்திருப்பேன்.
சிற்றெறும்பாய்ப் பிறந்தாலும்
சீரோடு மகிழ்ந்திருப்பேன்.
சின்னச் சிட்டாய்ப் பிறந்தாலும்
சிறகடித்தே பறந்திருப்பேன்.
புல்லாய் நான் பிறந்தாலும்
புன்னகை புரிந்தே வாழ்ந்திருப்பேன். !
கல்லாய் நான் பிறந்தாலும்
கவலையின்றிக் களித்திருப்பேன். !
இயந்திரங்கள் போல மனதை
அடிக்கடி மாற்றிவிட்டு
இஞ்சின் இதயங்களைப்
பொருத்திக் கொள்ளும்
இந்தப் பாழாய்ப் போன உலகில்
அலைமோதும் பாவஜென்மமாய்
மனித ஜென்மமாய்ப்
பிறந்துவிட்டேனே. !
என் செய்ய ?
எதற்காக இந்த அலைமோதல் ?
ஏனிந்த வீண் தேடல் ?
மனம் தினம் தினம்
செத்துப் பிழைக்கும்
இந்த உலகில்
உண்மையை
உண்மையான அன்பைத் தேடி
அலைகின்றேன்.
ஏனிந்த வீண் தேடல்
புரியாததுவும்
புரிந்ததும் போல் ஒரு குழப்பம்.

-- 80 ஆம் வருட டைரி. 

Related Posts Plugin for WordPress, Blogger...