எனது 24 நூல்கள்

எனது 24 நூல்கள்
எனது இருபத்து நான்கு நூல்கள்

செவ்வாய், 17 மே, 2022

வெட்கக் குறிப்புகள்

வருடத்தில் சிலமுறைதான்
எதிர்ப்படுகிறாய்.
வருடம் முழுமைக்கும்
பொங்கி வழிகிறது வெட்கம்.
எதிர்கொள்ள இயலாமல்
தலைகுனிந்து கடக்கிறேன்.
என் ஓரவிழிப் பார்வையை
எப்படியோ கவ்வி விடுகிறது
உன் கருடப் பார்வை.
நெளியும் மீனாய்
ஓடும் என் பின்
பரவிக் கிடக்கிறது
உன் பார்வை அணைப்பு.
உணர்வுகள் கிளர்ந்தெழ
பக்கம் இல்லாத உன் தோள்சாய்ந்து
இம்முறையும் கடக்கிறேன்
ஒரு சந்திப்புக்கும்
மறு சந்திப்புக்கும் இடையில்
யார் யாரோ பகிர்ந்த புகைப்படங்களில்
சிங்கம் போல் சிலிர்த்து நிற்கும்
உனைப்பார்த்து மௌனமாய் ரசித்து
பெருமிதப்பட்டுக் கொள்கிறது மனம்.
உனக்குத் தெரியாமல்
உன்னைக் காதலிப்பதென்பது பெரும் சுகம். 



புதன், 11 மே, 2022

நெகிழும் மணல்

சிதறும் அலைகளுக்குள்
கைபிடித்துச் செல்ல உன்னால் முடியும்
நனையும் அச்சமின்றிக்
காற்றைப் போல் வருகிறேன்
வெள்ளித் துகள்களாய் நம்மை
வரைந்து கொண்டிருக்கிறது சூரியன்
கால தேச வர்த்தமானம் இன்றிக்
கரைந்து ஓடுகிறோம் கரைகள் எங்கும்
பாதங்களின் கீழ் நெகிழ்ந்து நெகிழ்ந்து 
கடலுள் தன்னை மறைத்துக் கொள்கிறது மணல்.
 

வியாழன், 5 மே, 2022

பறத்தல்

ஆகப்பெரிய உயரத்தில்
ஒரு பறவை பறந்து போனது
மேகங்கள் அதன் கீழ்
மெத்தைகளாய்ப் புரண்டன
ஓய்வெடுக்கத்தான் அனுமதிக்கவில்லை
அப்பறவையின் இறக்கைகள். 
எதை நோக்கிப் போகிறோம்
எதற்காகப் போகிறோம்
காற்றின் கோதுதலிலும்
கனக்கத் தொடங்கின சிறகுகள்.

 
Related Posts Plugin for WordPress, Blogger...