ஸ்நேக சிரிப்புகள்

ஸ்நேக சிரிப்புகள்:-

--தேனம்மை

ப்ரியமுடன்
============

இந்தக் கவிதாயினியின் கவிதைகள்
புதிய சிந்தனையோடு உலா வருகின்றன.

பாரதியின் புதுமைப் பெண்ணாய் - கண்ணம்மாவாய் -
குரல் கொடுக்கிறது - இக்கவிக் குயில்.

இன்றின்  திருமணங்கள்  போலியாய் - பெண்ணடிமையை -
போதிக்கும்  கருவியாய் உள்ளதை ;

“ பறத்தலைக் கற்பிப்பதற்கன்றி
சுமத்தலைச்
சூடக் காத்திருக்கும்;

முறிந்து போகட்டும்
இந்தச்  சிறகுகள் “ எனச் சாடுகிறார்.

சுய சிந்தனையே சுத்தமாய் அற்றுப் போன
இந்த தேசத்துப் பிரஜைகளில் ; புதிய
பார்வையில் - புத்திசாலித்தனமாய் -
அறிவுபூர்வமாய் - அலசிப் பார்க்கிறாள் -
இந்தப் பெண்மணி, இதோ -

“தாவரங்களைப் பசுமையாக்கி
மனிதம் துவைத்து
மார்க்கண்டேய வரம் எடுத்து
வெளிச்சம் பாய்கிறது.”

மனசிலிருந்து தெறித்து விழுகிற நிஜ
உணர்வுகள், வார்த்தைகளாய் வந்து விழுகின்றன.

“ இழத்தல் “ என்பது
யார்க்குள்ளூம் ஏற்படலாம்-
உனக்குள்ளும்
எனக்குள்ளூம்
பிரிவின் தரிசனங்கள் கூட
எதிர்படக் கூடாது.”

ஓ! கவிதாயினி !
உன்
கவிதை மதுவருந்த
நாளும்
காத்துக் கிடக்கும்
கோடி வண்டுகள்!

இவை-
மயக்கம் தரும்
மதுக் கிண்ணங்களல்ல:

ஞானப் பால் தரும்
மார்பகங்கள்!

ப்ரியமுடன்

மனோ.