ரயிலோடும் முன்றில்

பயண ஆரம்பத்தில்

வழியனுப்ப வந்தபோது பார்த்தது.

மேகம் மூடியழவும்

திசைமாறியதில்

எங்கோ காணாமல் போனது.

இருள்பூவாய்ப் பூத்த கண்கள்

தேடிச் சோர்ந்து குவிந்தன.

புலரும் வரை

தேடித் தேடி ஓடித்தேய்ந்த அது

ஏதோ ஒரு திசையில் திரும்பி

எட்டிப் பிடித்தே விட்டது

வெள்ளிப் புன்னகை முகத்தோடு

வாழ்தல்

வாழ்தல்
நிஜமா கனவா
பாவனையா..

வார்த்தைச் சர்ப்பம்

எதிர்பாராமல் தலையெடுக்கும்

வார்த்தைச் சர்ப்பம்

விழுங்கிவிடுகிறது

உறவுகளையும் நட்புகளையும்

அடையாளம்

வார்த்தைகளால் உருவான உலகு

என்னையும் உமிழ்ந்தது.

வாக்கியங்களுக்குள்

சிக்கிக்கொண்ட வார்த்தையாய்

உயிர்மெய் இழந்தேன்.

அடையாளம் தேடியபோது

ஆயுத எழுத்து என

அறிவிக்கப்பட்டேன்,

மழுங்கடிக்கப்பட்டதை மறைத்து.

பூந்தடம்

பூங்காவை விட்டு வந்தபின்னும்

பாதங்களில்

பூந்தடம்..