பரிசோதனை

எல்லா வட்டங்களின் சுற்றளவும்

 சுருங்கிக் கொண்டே வருகிறது. 

இறுகிய வளையத்தின் உட்புறம்

 விலக விரும்பாமல் சுருண்டிருக்கிறேன்,

சுயத்தைப் பரிசோதிக்க.

பிசுக்கு.. பிசகு..

வீச வீசவும் 

ஒட்டிக் கொண்ட பிசுக்கு.

அடையாளங்களற்ற தழும்புகள் 

ஞாபகத்தின் ஸ்பரிசத்தில்.

பிசகென்று புரியும்போது

எண்ணங்களே புதைகுழியாய்.

எல்லாவற்றையும் உதறிவிடலாம்

என்னை என்ன செய்வது

மின்மினி

நட்சத்திர முத்தங்களைப்

பறக்கவிடுகிறது 

நிலவு.

சில்வண்டுக் கானங்களில்

மதிமயங்கிக் கிடக்கிறது 

மரம்.

மின்மினி உந்துகளின் உராய்வில் 

வெளிச்சம் ருசிக்கிறது 

இரவு.

அரூப உணர்வுகளோடு

அலமலந்து அலைகிறது

காற்று

உழல்தல்

ஏன் உழல்கிறேன் எப்போதும்

யார் யாரோ சுழலும்

எண்ணக் குப்பையில்..

ஆலிலை

அனுபவத்தின் பிரவாகத்தில் 

ஆலிலையாய் மிதக்கிறேன் 

சேரிடம் என்றெதுவுமேயில்லை