உழல்தல்

ஏன் உழல்கிறேன் எப்போதும்

யார் யாரோ சுழலும்

எண்ணக் குப்பையில்..

ஆலிலை

அனுபவத்தின் பிரவாகத்தில் 

ஆலிலையாய் மிதக்கிறேன் 

சேரிடம் என்றெதுவுமேயில்லை

ராஜாளி

திரும்ப வளருமென்றாலும் 

தேவையில்லையென 

வலியெழ

அலகை உடைக்கவும்

சிறகை முறிக்கவும்

முடிகிறது சில ராஜாளிகளுக்கு

ஆர்ப்பரிக்கும் அருவி

வீழ்ந்து வணங்கினாலும்

சிறப்பு வருமென 

ஆர்ப்பரிக்கிறது அருவி. 

வர்ணக் குழப்பம்

கருமையின் இருண்மையும் 

வெண்மையின் புனிதமும் 

பயமேற்படுத்துகிறது.

அரக்கின் முத்திரையும்

குழந்தைக் குங்குமமும் 

பாதுகாப்பும் பரவசமும்.

செஞ்சாந்தும் 

தங்க மஞ்சளும்

புழங்குகிறேனென்றாலும்

நீர்த்தும் இருக்கிறேன்.

நீலத்தில் மையலுண்டு

ஊதாவில் தூய விருப்பம்

பச்சையம் ரொம்பப் பிடிக்கும். 

பச்சைக்கு என்னைப் பிடிக்குமா

என்பது தெரியாமல்

வர்ணக் குழப்பத்தில் தோய்ந்து நான்