போ நீ போ

சுவாசமே சுவாசமே என்றும்

உன்னைத்தொட்ட காற்று வந்து 

என்னைத் தொட்டதென்றும்

பாடிக் களித்தவர்கள் இன்று

போ நீ போ

தனியாகத் தவிக்கின்றேன்

துணை வேண்டாம் போ நீ போ

எனப் பாடுகிறார்கள்

கொரோனா காலக் கொடுமைகள்

பாடல்களிலும் பல் பதிக்கின்றன. 

செம்மாந்தல்.

மஞ்சள் இஞ்சி மிளகு

மாமருந்தாகிவிட்டது

சுக்குமி ளகுதி ப்பிலி என்று

கேலி செய்தவர்கள்

கசாயத்தின் பிடியில் காய்ச்சலைக் 

கரைத்துக் கொண்டிருக்கிறார்கள்.

கபசுரக் குடிநீரும்

நிலவேம்பும் சுவையற்ற நாக்கில்

கசப்புப் பாயாசங்களாக

வழிந்தோடுகின்றன. 

கோள்களும் கிரகங்களும்

நாட்டை சுத்தமாக்கிவிட்ட மகிழ்ச்சியில்

செம்மாந்து சிரித்துக் கொண்டிருக்கிறார்கள்.  

  

நியாயத் தராசு

நியாயத் தராசு ஏறி இறங்குகிறது

மூச்சுக்கு முன்

மூச்சுக்குப் பின் என.

முள்ளில் இல்லை

தட்டிலும் இல்லை

ஊடாடும் காற்றில்தான் இருக்கிறது

நியாயத்தின் உயிர்த்தல். 

  

அண்ணாரைப் போல..

இந்தக் காலத்தில்

மறைந்தவர்கள்

மனம் கனக்கச் செய்கிறார்கள்.

பட்டினத்தார் பாடலொன்று

கத்தும் நமைப்பார்த்துக்

கணக்கென்ன என்கிறது. 

இன்னொன்றோ

அண்ணாரைப் போலத் 

திரியச் சொல்கிறது..

இரண்டும் கெட்டானாகி

மூன்றாம் உலகு விரிகிறது.

நிழல் பிரசவம்

விளக்கிலிருந்து பிறக்கும் தீபம்

மாடத்துள் பிரசவிக்கிறது

மூன்று நிழல் விளக்குகளை..

  

ஆலமும் காலமும்

தலையிலிருந்து வால்வரை

விழுங்கி விழுங்கி

உயிர்க்கின்றன அரவுக் கிரகங்கள்

விழுங்கும் ஒவ்வொருமுறையும்

வாதாபியாய் வெளிப்படுகிறேன்

எப்போது ஜீரணமாவேனென்பதை

தர்மராஜனே அறிவான்

ஆலமும் காலமும்

நுரைத்துப் பொங்கிக் கொண்டிருக்கின்றன. 

  

நானென்ற ஒன்றா..

ஆயிரம் நிலவை அழைத்தவர்

மூச்சுள்ளும் 

உன்மத்தம் பிடித்தலைகிறது

கிருமி அலை..

அவ்வலை சிந்தும் துளிகளில்

நான் யார் நீ யார்

என்றொரு ஆராய்ச்சி நடக்கிறது

ஒவ்வொரு அலையாய்ப்

பிடிந்தலைந்தும்

குழப்ப முடிச்சுக்கள்

கரையில் தள்ளுகின்றன

யோசித்தும் சுவாசித்தும்

பிழைத்துக் கிடப்பது யார்

நானா  .. நானென்ற ஒன்றா.. 

  

பயன்..

மூச்சுக் குழலுக்குள் 

முக்குளித்து மூச்செடுக்கிறது.

சாதா காய்ச்சலும் காங்கையும்

சள்ளைப் படுத்துகிறது.

கொடுமை கொடுமை என

கோவிலுக்கும் செல்ல விடுவதில்லை. 

என்னே பயன் எனில்

தனித்தனியாய்க் கிடந்தோரை

தனிமையில் தள்ளுவதுபோல்

குடும்பங்களை ஒன்று சேர்க்கிறது 

கொரோனா.

  

பச்சோந்தி

பச்சோந்திபோல்

உடல்மாறும் கிருமி

மனிதரைத் தாக்க

முள்முடி சுமந்தலைகிறத

கடைசிவிருந்தில்

மூச்சுக் காட்டிக் கொடுக்க 

நுரையீரல்தான்

தீர்ப்புக் கூறும் இடமாகிறது

  

இஞ்சியால் ஆனது உலகு

இஞ்சி சட்னி

இஞ்சித் துவையல்

இஞ்சிப் புளி

இஞ்சி மண்டி

இஞ்சி ரசம்

இஞ்சி சூப்

இஞ்சி ஜூஸ்

இஞ்சிக் குழம்பு

இஞ்சி சாதம்

இஞ்சிக் கொழுக்கட்டை

இஞ்சியால் ஆனது உலகு,

கொரோனாவுக்குப் பின். 

அலையும் கிருமி

நுரையீரலில் புகும் கிருமி

ஊஞ்சல் கட்டி ஆடுகிறது

உயிருடனும் 

உயிர்வாழ்வதற்கான சேமிப்புடனும்.

சுருங்கும் நுரையீரலாய்ச்

சுருங்குகிறது சேமிப்பு.

சறுக்கிவிழுந்து

குதித்தோடுகிறது உயிர்

போராட முடியாமல்.

இன்னொரு ஊஞ்சல் தேடி

விரிந்த தலையோடு 

அலைந்து கொண்டிருக்கிறது கிருமி. 

  

கபசுரம்.

காங்கையா காய்ச்சலா

கழுத்தை வருடிச் செல்கிறது

கபசுரக் குடிநீர்.

  

பூக்கும் காதல்.

முற்றிய மரமும்

துளிர்விடுகிறது

வருடந்தோறும் 

பூக்கும் காதலில்.

    

உயிரென்பது..

எத்தனை சட்டைகள்

எப்படி உரிந்தன

எங்கே இருக்கிறேன் நான்

உணர்வா சுவாசமா

உயிரென்பது என்ன?

  

வாசனைப் பரிசு.

குலாவிக் குலாவி

மரங்களைக் கொஞ்சிச்

செல்கிறது காற்று.

குலாவலுக்குப் பரிசாய்

வாசனை முத்தங்களைக் 

கொடுக்கின்றன மரங்கள். 

  

தாலாட்டு.

தாழ்ந்து தலையாட்டும் கிளையைத்

தாயாகத் தாங்கித்

தாலாட்டிச் செல்கிறது நதி.