மீன் தீபம்.

தீபங்கள் அசைவதாய்

மீன்கள் நீந்தும் தொட்டி

ஒளியேற்றுகிறது

உயிர்ப்பற்ற வீட்டை

அசைவு

அசைவற்ற காற்றும்

அசையாத மணியும்

ஒளித்து வைத்திருக்கின்றன

சத்தத்தை.

தொடர்பு

உலகத் தொடர்பற்று

ஓய்ந்து கிடக்கிறது

என்னைப் போலவே

என் கணினியும்.

ஈசல் வாழ்வு.

ஈசல் உதிர்க்கும் சிறகுகள்
சொல்லிச் செல்கின்றன
பறக்கும் காலத்தை.

ஒருநாள் வாழ்வென்றாலும்
பறத்தலை நிறுத்துவதில்லை
ஈசல்கள்.

வண்ணத்திப் பூச்சிகளுக்கும்,
மின்மினிகளுக்கும் குறைவானதல்ல
ஈசலின் வாழ்வு.

ஒரு பூ மலர்ந்துதிர்வதாய்
எந்த துக்கமுமில்லாமல் சிறகுதிர்த்து
பறந்து சென்று விடுகின்றன அவை.

கரும் சாம்பல் மேகங்களாய்க்
கடந்து கொண்டிருக்கிறது
ஈசலின் இருப்பு.

தொடர் ஓட்டம்.

தடை ஓட்டத்தில்

வெற்றி பெற்றாலும்

தொடர் ஓட்டம்தான்.

கால்களற்ற காலங்கள்.

கால்களற்ற காலங்கள்

கடத்திப் போகின்றன.

கைபிடித்துச் சென்ற யுவதியைக்

கிழவியாக்கித் தொலைக்கின்றன.

நுரைப்புன்னகையோடு

அடித்துச் செல்லப்பட்டவள்

கண்ணோரம் கீறும்

காக்கைக் கோடுகளால் சிரிக்கிறாள்.